ரெய்கி வகுப்பு
ரெய்கி வகுப்பு
ஆழ்மனம் லேபிளுடன் இடுகைகளைக் காண்பிக்கிறது. அனைத்து இடுகைகளையும் காண்பி
ஆழ்மனம் லேபிளுடன் இடுகைகளைக் காண்பிக்கிறது. அனைத்து இடுகைகளையும் காண்பி

பேசும் மனம் - மனம்தான் வழிகாட்டி

மனிதனின் மனதை பெரும்பாலும் மூன்று பிரிவுகளாக பிரிப்பார்கள். புறமனம், நடுமனம், மற்றும் ஆழ்மனம். புறமனம் என்பது நம்மோடு அனுதினமும் பேசிக்கொண்டும் சில நேரங்களில் உளறிக் கொண்டும் இருக்கும் மனம். நடு மனமானது ஒரே விசயத்தை  மீண்டும் மீண்டும் நினைவுபடுத்திக் கொண்டிருக்கும் மனம். ஆழ்மனமானது தெய்வீகத் தன்மை உடையது. அது அமைதியாகவே இருந்து நமக்கு முக்கியமான நேரங்களிலும், ஆபத்தான நேரங்களிலும் மட்டுமே நம்முடன் தொடர்பு கொள்ளும்.

மனிதனுக்கு இருப்பது ஒரே மனம்தான், ஆனால் அந்த மனம் செயல்படும் நிலைகளையும், தன்மைகளையும், வைத்து அதை மூன்று பிரிவுகளாக பிரித்திருக்கிறார்கள்.

புறமனம் தனது ஆசைகளையும், கட்டளைகளையும் மாற்றிக்கொண்டே இருக்கும். உதாரணத்திற்கு ஒரு பழம் வாங்க வேண்டும் என்று ஆசை தோன்றினால் வெளி மனமானது ஆப்பிள், ஆரஞ்சு, அன்னாசி என்று பார்க்கும் பழங்களின் மீதெல்லாம் ஆசை கொள்ளும். அதை வாங்க தூண்டும்.

அதே நேரத்தில் நடுமனம் செயல்பட்டால், ஏதாவது ஒரு பழத்தை குறிப்பிட்டு அதை வாங்கத் தூண்டும். மீண்டும் மீண்டும் அந்தப் பழத்தின் நன்மைகளையும், தேவைகளையும் குறிப்பிட்டு, அதன் நினைவையும் உருவாக்கிக் கொண்டே இருக்கும். ஒரே பழத்தை மீண்டும் மீண்டும் நினைவுபடுத்துமே ஒழிய மாற்றி மாற்றி பல பழங்களின் மீது ஆசையை உருவாக்காது.

அதே வேளையில் ஆழ்மனம் செயல்பட்டால், நம் உடலுக்கு நன்மையான, தேவையான, ஒரே ஒரு பழத்தின் பெயரை உச்சரிக்கும். அல்லது அந்தப் பழத்தின் காட்சியை மனதில் உருவாக்கும் அவ்வளவுதான். ஆழ்மனமானது ஒரே ஒருமுறை சொல்லும் அல்லது ஒரே ஒருமுறை காட்சியாக காட்டும். அதற்கு மேல் மீண்டும் மீண்டும் நினைவுபடுத்தாது. ஆழ்மனம் பேசும்போது நாம் தெளிவாக கவனிக்காமல் விட்டு விட்டால், மிக முக்கியமான நன்மையான ஒரு விசயத்தை நாம் இழக்க நேரிடும்.

ஒவ்வொரு மனிதனுக்கும் இக்கட்டான சூழ்நிலைகளிலும், ஆபத்தான நேரங்களிலும் ஆழ்மனம் அவர்களுக்கு அந்த பிரச்சனையிலிருந்து வெளிவர தீர்வுகளை கொடுக்கும். ஆனால் பெரும்பாலானவர்கள் பெரும்பாலான சூழ்நிலைகளில் ஆழ்மனதின் கட்டளைகளையும் பரிந்துரைகளையும் கவனிக்கத் தவறுகிறார்கள்.

சிலர் புறமனதில் உருவாகும் எண்ணங்களை வைத்து கடவுள் நமக்கு வழிகாட்டுகிறார் என்பதை போல் கற்பனை செய்து சிக்கலில் மாட்டிக் கொள்கிறார்கள்.

புறமனம், நடுமனம், மற்றும் ஆழ் மனதின் செயல்பாடுகளை தெளிவாக புரிந்துக் கொண்டால், நாம் பல பிரச்சனைகளில் இருந்து விடுபட்டு நிம்மதியாகவும் மகிழ்ச்சியாகவும் வாழலாம்.

உதாரணத்திற்கு நேற்று நான் மோட்டார் சைக்கிளில் ஒரு ஊருக்கு சென்றேன். நான் தலைக்கவசம் அணியவில்லை. என்னிடம் மோட்டார் லைசென்சும் கிடையாது. அந்த ஊரில் நான் காண சென்ற மனிதர் இல்லை. வெகுதூரம் வந்துவிட்டோம், மோட்டார் சைக்கிளில் வேறு எங்காவது செல்லலாம் என்று ஆசைப்பட்டு பக்கத்து ஊருக்கு செல்ல முடிவு செய்தேன்.

பக்கத்து ஊருக்கு செல்லலாம் என்று அந்த ஊரின் பெயரை நினைத்த உடனேயே என் மனக்காட்சியில் சில காவல்துறை அதிகாரிகள் அந்த ஊரின் எல்லையில் நிற்பதை பார்த்தேன்.

மனக்காட்சியில் அதை நான் பார்த்த பிறகும் அந்த ஊருக்கு சென்றேன். ஆனால் முன்னெச்சரிக்கையாக மனதில் அந்த காட்சி தோன்றிவிட்டதால் போலீஸ்காரர்கள் நிற்கிறார்களா என்று பார்த்துக்கொண்டே சென்றேன். சில மீட்டர் தூரத்துக்கு முன்பாகவே போலீஸ் அதிகாரிகள் நிற்பதை கவனித்து விட்டு மோட்டார் சைக்கிளை திருப்பி என் ஊருக்கே திரும்பிவிட்டேன்.

பக்கத்து ஊருக்கு செல்லலாம் என்ற ஆசையை தூண்டியது எனது புறமனம். அந்த ஊர் எல்லையில் காவல் துறை அதிகாரிகள் இருக்கிறார்கள் என்று எச்சரிக்கை விடுத்தது எனது ஆழ்மனம். அன்று ஆழ்மனதை கவனித்ததால் ஒரு சிக்கலில் இருந்து தப்பித்து விட்டேன். என் வாழ்க்கையில் பல சந்தர்ப்பங்களில் ஆழ்மனதின் வழிகாட்டுதலின்படி பல பிரச்சினைகளிலிருந்து தப்பித்து இருக்கிறேன்.

அதைப்போலவே எனக்குத் தெரியாதா என்ற அகம்பாவத்தினால், ஆழ்மனதின் வழிகாட்டுதலை உதாசீனப்படுத்திவிட்டு பல சிக்கல்களிலும் பல மன வேதனைகளிலும் சிக்கி இருக்கிறேன்.

ஆழ்மனம் காட்டும் எச்சரிக்கைகளையும், வழிகாட்டுதல்களையும் உன்னிப்பாகக் கவனிக்கத் தொடங்குங்கள். அது உங்களின் வாழ்க்கையை சீராக்கும்.நிம்மதியான, பாதுகாப்பான, மகிழ்ச்சியான, வாழ்க்கையை உங்களுக்கு அமைத்து தரும்.

மனிதர்களுக்கு வழங்கப்படும் பிரபஞ்சத்தின் வழிகாட்டுதல்கள்

ஆன்மாவும், ஆழ்மனமும், பிரபஞ்சமும், தெய்வங்களும், கண்ணுக்குத் தெரியாத மற்ற சக்திகளும், எப்போதுமே நமக்கு வழிகாட்டிக் கொண்டே இருக்கின்றன. மனிதர்கள் தங்களின் வாழ்க்கையை சிறந்த முறையில் வாழ அனைத்து திசைகளிலிருந்து அவர்களுக்கு வழிகாட்டுதல்கள் வந்துகொண்டே இருக்கும்.

வாழ்க்கையை தெளிவில்லாமலும், அவசரத்திலும் வாழும் போது இந்த வழிகாட்டுதல்கள் பெரும்பாலும் நமக்குப் புரிவதில்லை. மனிதர்களுக்கு வழங்கப்படும் செய்திகளும் வழிகாட்டுதல்களும் எவ்வாறு இருக்கும்? மனிதர்களுக்கு வழங்கப்படும் வழிகாட்டுதல்கள் பெரும்பாலும் உணர்வுகளாகவும், எண்ணங்களாகவும், காட்சிகளாகவும், உருவங்களாகவும், சின்னங்களாகவும், இருக்கும்.

உதாரணத்திற்கு ஒருவருக்கு ஒரு விசயத்தை செய்யலாமா வேண்டாமா என்று ஒரு குழப்பம் ஏற்பட்டு இருக்கிறது என்று வைத்துக்கொள்வோம். அவருக்கான விடையானது இந்த விசயத்தை செய் அல்லது செய்யாதே என்றோ, அந்த விசயத்தை ஏன் செய்ய வேண்டும் அல்லது ஏன் செய்யக்கூடாது என்றோ பதில் வழங்கப்படாது. மாறாக அவருடைய உள்ளத்தில் ஒரு மகிழ்ச்சியான, ஆனந்தமான அல்லது அமைதியான உணர்வு தோன்றும். இது அவருக்கு இந்த விசயத்தை செய்யலாம் என்று கொடுக்கப்படும் அனுமதியாகும். அல்லது சிலருக்கு அச்ச உணர்வோ, ஆபத்தான சூழ்நிலையில் இருப்பது போன்ற ஒரு உணர்வோ, அல்லது கவலை உருவாகும். இது அவருக்கு அந்த செயலை செய்யக்கூடாது என்று வழங்கப்படும் பதிலாகும்.

ஒரு கேள்விக்கான விடை வெளியிலிருந்து வரும் பொழுது எப்படி இருக்கும்? ஒரு விசயத்தை செய்யலாமா வேண்டாமா என்ற குழப்பம் ஏற்பட்டால் இறைவனிடமும் இயற்கையிடமும் நாம் தீர்வை நாடும் போது, சற்று நேரத்தில் பத்திரிக்கையிலிருந்தோ, புத்தகத்திலிருந்தோ, வெளியிலிருந்தோ, ஏதோ ஒரு சொல் அல்லது ஒரு காட்சி நம்மை கவர்ந்து இழுக்கும். அந்தக் காட்சியில் அந்த இடத்தில் இருக்கும் எழுத்து, சொல், சித்திரம், உருவம், அறிகுறி, போன்றவற்றை வைத்து நமக்கு என்ன பதில் வழங்கப்பட்டிருக்கிறது என்று தெரிந்துகொள்ளலாம்.

உதாரணத்திற்கு என் வாழ்வில் நடந்த ஒரு நிகழ்வை குறிப்பிடுகிறேன். ஒரு நாள் காரில் பயணம் செய்து கொண்டிருக்கும் போது, மனிதர்கள் உறங்கும் போது என்ன நடக்கிறது? ஆன்மா என்ன செய்கிறது? மனம் என்ன செய்கிறது? என்பன போன்ற குழப்பங்களும் சிந்தனைகளும் என் மனதில் ஓடிக்கொண்டிருந்தன. அப்போது என் உள்ளுணர்வு ரேடியோவை சிங்கப்பூர் சேனலுக்கு மாற்ற வேண்டும் என்று தோன்றியது. சிங்கப்பூர் வானொலியான 96.8க்கு நான் மாற்றிய பொழுது அதில் டாக்டர் காதர் இப்ராஹிம் அவர்கள் தூங்கும் போது என்ன நடக்கிறது என்பதை விளக்கிக் கூறிக் கொண்டிருந்தார்.

இன்னொரு தடவை ஒரு இடத்துக்கு செல்லலாமா, வேண்டாமா என்ற குழப்பம் ஏற்பட்டு கொண்டிருக்கும் போது தெருவில் “Just Do It” என்ற ஒரு வாசகம் என் கண்ணில் தென்பட்டது. இதுதான் எனக்கு கிடைத்த பதில். பெரும்பாலான வேளைகளில் எனக்கு குழப்பங்களோ, சந்தேகங்களோ, தோன்றினால் இந்த பிரபஞ்சத்திலிருந்து எனக்கு வழிகாட்டுதல்களும், காட்சிகளும் அறிவிக்கப்பட்டுக் கொண்டிருக்கும். இந்த உலகத்தில் இருக்கும் ஒவ்வொரு மனிதனுக்கும் இந்த பிரபஞ்சம் வழிகாட்டிக் கொண்டே இருக்கும். அவர்கள்தான் அந்த வழிகாட்டுதல்களை புரிந்துகொள்ள முயற்சி செய்ய வேண்டும்.

தொடக்கத்தில் நம்முடைய மனமானது தன்னுடைய ஆசைகளை முதலில் காட்டும். அந்த மனதின் அறிவிப்புகளையும், பிரபஞ்சத்தின் அறிவிப்புகளையும் பிரித்துப் பார்க்க பழகிக் கொள்ள வேண்டும். பிரபஞ்சம் நமக்கு வழிகாட்டுகிறது என்ற புரிதல் வந்த உடனேயே படிப்படியாக மனதின் எண்ணங்களையும், பிரபஞ்சத்தின் அறிவிப்புகளையும் பிரித்துப் பார்க்கக்கூடிய தன்மை நமக்குள் உருவாகிவிடும். பிரபஞ்சத்தின் அல்லது இறைவனின் வழிகாட்டுதலைப் பின்பற்றினால், வாழ்க்கையில் எல்லா வகையான இன்பமும், வெற்றியும், மகிழ்ச்சியும், நிம்மதியும், தானாக நம்மை வந்தடையும்.